Дмитрий Бочаров йўлланма учун ички кураш ҳақида: "Рақобат анчагина кучли эди"

Июнь ойида мамлакат биринчилигидаги ғолибликдан сўнг ушбу йўлланма терма жамоанинг ёш спортчиси Дмитрий Бочаровга ишониб топширилди.

Ўзбекистон велосипед спорти федерацияси матбуот хизмати Дмитрий Бочаров билан суҳбат уюштириб, бир қанча саволларга жавоб олди.

— Сиз ўзингизнинг 22 ёшингизда Олимпиадада дебют қиляпсиз. Фаолиятини 2015 йилда бошлаган велоспортчи учун бу қанчалик эрта ёки кеч ҳисобланади?

— Бу жуда яхши натижа, менимча. Ҳар ҳолда, мен шу кунгача велоспорт баҳсларида қатнашган ўзбеклар орасида энг ёш атлетман.

— Париждаги Олимпиадада иштирок этишингиз мусобақа стартига деярли бир ой қолганида аниқ бўлди. Унга тайёргарлик қай даражада бўлмоқда?

— Тўғри, Олимпиадага оз вақт қолди. Лекин мен бу мусобоқа учун бутун фаолиятим давомида тайёргарлик кўриб келмоқдаман. Ҳозирги вақтда эса машғулотларни кўпайтирган ҳолда юқори даражада олиб бормоқдаман. Ҳозир олиб бораётган машғулотларим Олимпиада вақтида жисмоний ҳолатимни максимал даражага олиб чиқиши учун мутахассис-мураббийлар томонидан тузиб чиқилган.

— Умуман олганда, Парижга бориш ҳаёлингизга келганмиди? Ҳар ҳолда бу йўлда сиздан ташқари уч нафар велоспортчи рақобатга киришган эди.

— Париж Олимпиадасида иштирок этаман, деб ўйламаган эдим. Лекин шу кунгача айнан шу мақсад ила шуғулланиб келдим. Тўғри, рақобат анчагина кучли эди. Лекин биз бир жамоамиз ва барчамизнинг мақсадимиз бир нарсага йўлланган эди. Бу ҳам бўлса Олимпиадада Ўзбекистон байроғини юқорига кўтариб, бутун жаҳон олдида ўз мадҳиямизни янгратиш. Бу имконият менга берилганидан жуда хурсандман!".

— Ўзингизнинг дебют Олимпиадангиздан нималар кутяпсиз?

— Бу менинг илк Олимпиадам. Давлатимиз президенти Шавкат Миромонович Мирзиёев, шунингдек, Танзила Камоловнага бизга берган ёрдами ва билдирган ишончи учун раҳмат айтмоқчиман. Қолаверса, менга яқиндан ёрдам кўрсатган барча инсонларга ҳам миннатдорчилик билдираман. Мақсадим — албатта жамоамнинг ишончини оқлашдир!