"Ҳумо" ўз уйида "Торпедо"га имкониятни бой бериб қўйди, "Tashkent Select"да эса ғалаба

Қозоғистон чемпионатида иштирок этаётган Тошкентнинг "Ҳумо" хоккей клуби кеча ўз уйида Усть-Каменогорск шаҳрининг "Торпедо" жамоасини қабул қилди.

Ўйиннинг асосий вақти ҳамда овертаймда ҳисоб 2:2 кўринишида бўлди. Буллитлар сериясида эса омад қозоғистонликларга кулиб боқди — 2:3.

Мазкур ўйиндан кейин "Ҳумо"нинг очколари сони 24 тани ташкил этмоқда, "қанотлилар" турнир жадвалида бешинчи ўринни эгаллаб турибди. Мусобақа пешқадами бўлиб турган "Торпедо" ҳисобида эса 33 очко мавжуд. Бугун жамоалар ўртасидаги иккинчи ўйин ташкил этилади.

Бундан ташқари, кеча Қозоғистон ёшлар чемпионатида иштирок этаётган "Tashkent Select" жамоаси Атираунинг "Жас Батир" клуби меҳмони бўлди ва овертаймда 4:3 ҳисобида ғалабани илиб кетди.

Бир кун олдин ўтказилган илк ўйинда қозоғистонлик ёш хоккейчилар 14:3 ҳисобида зафар қучган эди.

Ғалабадан кейин тошкентликларнинг очколари сони 8 тага етди. Улар турнир жадвалида 11-ўринда бормоқда.