Ўзбекистонлик боксчининг ғалабаси билан якунланган жанг тарихга кирди

Эътиборлиси, Ўзбекистон аёллар терма жамоаси аъзоси Фарзона Фозилова тарихий жанг иштирокчисига айланди. 22 ёшгача боксчилар ўртасида Осиё чемпиони бўлган вакиламиз Таиланддаги қитъа чемпионатининг илк даврасида непаллик Аарати Бхомжанни ҳакамларнинг якдил қарори эвазига мағлубиятга учратди. 

Осиё бокс конфедерацияси матбуот хизматининг хабар беришича, ушбу баҳс осиёлик боксчи қизларнинг шлем, яъни бош ҳимоя воситасисиз ўтказган илк жанги сифатида тарихга кирди. 

"U22 Осиё чемпиони бўлган ўзбекистонлик Фарзона Фозилова -48 кг вазнда қитъа чемпионати дебютанти непаллик Аарати Бхомжанни мағлуб этди. Бхомжан Осиё чемпионатига саралаш вазифасини ўтаб берган Непалнинг ички мусобақасида U22 Осиё чемпионати кумуш медали соҳибаси Сусму Тамангни шов-шувли тарзда таслим этган эди. 21 ёшли Фозилова ўзи учун катталар ўртасидаги илк Осиё чемпионатида тезлик эвазига рақибасидан устун келди. Айнан шу жанг Осиё чемпионатида аёл боксчилар шлемсиз рингга чиққан илк жанг сифатида тарихга кирди", — деб ёзади ASBC расмий сайти.