14 мар 14:22
Новости

Бокс/ММА

Сабриэль Матиаснинг иккинчи чемпионлик ҳимоя жанги тасдиқланди

Куни кеча Эдди Хирнга тегишли Matchroom промоутерлик компанияси билан 3 та жангга мўлжалланган шартномага имзо чекка Сабриэль Матиас навбатдаги чемпионлик жангини ўтказади.

Биринчи ярим ўрта вазн тоифасида IBF чемпиони бўлиб турган Матиас 15 июнь куни ўз ватани Пуэрто-Рикода рингга кўтарилади. Унинг рақиби австралиялик даъвогар Лиам Паро (24-0, 15 КО) бўлади. Мағлубият ва муроса нималигини билмай келаётган Паро рейтингнинг 6-поғонасидан жой олган.

ESPN нашри тарқатган хабарга кўра, томонлар шу кунларда расман жанг шартномасига имзо чекишади. Сабриэлнинг иккинчи чемпионлик ҳимоя жанги DAZN стриминг сервиси томонидан трансляция қилинади.

Эслатиб ўтамиз, 32 ёшли Матиас ўтган йилнинг ноябрь ойида ҳамюртимиз Шоҳжаҳон Эргашевни техник нокаутга учратиб, ўз камарини илк бор муваффақиятли ҳимоя қилган эди.