21 сен 11:12
Новости

Бокс/ММА

Санжар Зокировнинг ONE Championship'даги қолдирилган жанги қачон ўтказилиши маълум

Ўзбекистонлик аралаш яккакураш устаси Санжар Зокиров 6 сентябрь куни АҚШнинг Колорадо штати, Денвер шаҳрида ўтказилган ONE 168 турнирида жанг қилиши керак эди.

Ўша куни 21 ёшли ҳамюртимизга япониялик Хироба Миноуа рақиблик қилиши керак эди. Аммо жангга яқин вақт қолганида Зокиров ўзининг Инстаграм саҳифаси орқали баҳс қолдирилганини маълум қилганди.

ONE Championship лигасининг хабар беришича, Санжар Зокировнинг Хироба Миноуага қарши жанги 4 октябрь куни Таиланднинг Бангкок шаҳрида ташкил этиладиган ONE Fight Night 25 турнири доирасида ўтказилади.

Маълумот учун, Санжар Зокиров фаолияти давомида 10 та жанг ўтказиб, уларнинг барчасида рақибларидан устун келган. Япониялик Миноуа ҳисобида эса 14 ғалаба ва 5 мағлубият бор.

Таъкидлаш жоиз, ONE FC асосий Лигасида ҳозирга қадар фақатгина бир нафар ҳамюртимиз — Жасур Мирзамуҳаммедов жанг қилиб, 1 ғалаба ва 1 мағлубият қайд этган эди.