Бектемир Меликўзиев чемпионлик жангидан четда қолди(ми?) Хайме Мунгиянинг кейинги рақиби ва жанг санаси эълон қилинди

Бироқ DAZN Boxing маълумотига кўра, Мунгияга бошқа рақибга қарши ихтиёрий ҳимоя жанги ўтказишга рухсат берилган кўринади. 31 октябрь куни Ар-Риёдда ўтказиладиган бокс оқшомида Хайме Мунгия WBA камарини россиялик Никита Зонга қарши ҳимоя қилади. Зонь рейтингда 9-ўринда туради.

Турнирнинг асосий жангида эса Сауль "Канело" Альварес мағлубиятсиз Кристиан Мбилли билан WBC камари учун рингга чиқади.

Бектемир Меликузиев WBA рейтингида бир йилдан ортиқ вақт давомида биринчи ўринда бўлиб келаётгани ва мажбурий даъвогар мақомига эга эканига қарамай, титул баҳсидан яна мосуво бўлгандек тасаввур уйғонмоқда. Сентябр ойида ташкилот Мунгия ва Мелиқўзиев томонларига музокараларни якунлаш учун 21 октябрга қадар муддат берган эди. Шунга қарамай, белгиланган муддат якунланмасидан Мунгияга бошқа рақибга қарши ихтиёрий ҳимоя жангини ўтказишга рухсат берилгани мухлислар ва бокс жамоатчилигида саволлар туғдирди.

Олдинроқ, Мелиқўзиев Мунгия билан жангни ташкил этиш учун барча шартларга рози эканини билдирган эди. Унинг сўзларига кўра, мексикалик боксчи томони унга вақтинча даъвогарлик навбатидан чекиниш учун компенсация таклиф қилган, бироқ у бунга рози бўлмаган.

"Спорт қоидалари ҳурмат қилиниши керак. Мен камар учун ҳатто гонорарсиз ва WADA тестисиз ҳам жанг қилишга тайёрман", — деган эди Мелиқўзиев.

Ўзбекистонлик боксчи, шунингдек, агар асосий масала гонорар бўлса, жангни Ўзбекистонда ўтказиш ва Мунгияга қўшимча ҳақ тўлаш таклифини ҳам билдирган. Ҳозирча Мунгия ва Мелиқўзиев ўртасидаги мажбурий жанг қачон ўтказилиши номаълум.

Айрим бокс шарҳловчилари WBA қарорини танқид қилмоқда.