30 миллиондан ошиқ киши Мбаппе "Реал"ни тарк этиши кераклиги ҳақидаги петицияга имзо чекди

"Actu Foot" порталининг хабар беришича, петиция атиги бир соат ичида 70 000 дан ортиқ имзо тўплаган. Ҳозирда унда 30 миллиондан ортиқ имзо бор.

"Мбаппе — аут! "Реал" мухлислари, овозингизни чиқаринг! Агар ўзгариш зарур деб ҳисобласангиз, жим турманг — ушбу петицияга имзо чекинг ва клуб келажаги учун энг яхши деб ҳисоблаган нарсангизни қилинг", – дейилади петицияда.

Мбаппе вакиллари ҳатто махсус баёнот ҳам берди.

"Танқидларнинг бир қисми клуб томонидан қатъий назорат қилинадиган тикланиш даври билан боғлиқ элементларнинг ҳаддан ташқари талқин қилинишига асосланган. Бу Килианнинг жамоа учун ҳар куни қилаётган фидойилиги ва меҳнатини акс эттирмайди", – дейилади баёнотда.

Аввалроқ "L'Equipe" Мбаппенинг жамоа ўйинчилари билан муносабатлари ёмонлашгани ҳақида хабар берганди. Газетанинг ёзишича, "қаймоқранглилар"нинг кўплаб футболчилари француз футболчиси клубда махсус имтиёзларга эга деб ҳисоблайди.