Афрузада кетма-кет тўртинчи ғалаба, ака-ука жаҳон чемпионларида ҳам

8, 10 ҳамда 12 ёшли шахматчилар ўртасида ташкил этилаётган жаҳон чемпионатида дунёнинг 100га яқин мамлакатидан истеъдодли шахматчилар иштирок этяпти.

Улар орасида ҳамюртларимиз – ака-ука жаҳон чемпионлари Исломбек ва Жавоҳир Синдаров, Осиё чемпиони Ҳумоюн Бекмуродов, қизлардан Мафтуна Бобомуродова, Юлия Хегай ва Афруза Ҳамдамовалар юртимиз шарафини ҳимоя қилишяпти.

Саккиз ёшлилар ўртасидаги мусобақада имкониятини синаб кўраётган Ҳумоюн Бекмуродов 4-турда оқ доналарда ўйнашига қарамай, канадалик Александр Чанг билан дуранг қайд этди.

Ўн ёшли шахматчилар баҳсида биринчи рақам остида таснифланган Исломбек Синдоров оқ доналарда ҳаракат қилиб, қозоғистонлик Диас Алимбетовни мағлуб этди.

Ўн икки ёшли шахматчилар мусобақасида иккинчи тартиб рақамли иштирокчи бўлган Жавоҳир Синдоров эса 4-турда россиялик Василий Вловичдан устун келди.

Қизларимиздан Афруза Ҳамдамова барчани ҳайратлантиришда давом этяпти. Афруза кетма-кет тўртинчи ғалабасини қўлга киритди. У рейтингда ўзидан юқорида турган мўғулистонлик Даваакхуу Унурзулни мағлубиятга учратди ва пешқадамликни давом эттирмоқда.

Юлия Хегай польшалик Лена Заребскага имкониятни бой бериб қўйди. Мафтуна Бобомуродова эса қора доналар ўйнашига қарамай, қирғизистонлик Арина Асановадан устун эканлигини амалда исботлади.