Аҳад Юсупов: “Афғонистонни мағлуб этишимизга ишонаман”

Биз ҳозирча терма жамоамизнинг сўнгги ўйини бўлиб турган – БААга қарши кечган учрашувдан сўнг бош мураббий Аҳад Юсуповнинг фикрлари билан қизиқдик.

- Аҳад ака, Осиё ўйинларига тайёргарликдан кўнглингиз тўлмади, шундайми?

- Шундай дейиш ҳам мумкин. Тайёргарлик Тошкентда бўлиб ўтди. Осиё ўйинларига жўнаб кетиш олдидан бир ҳафта мобайнида пойтахтимизда ўқув-машғулот йиғинини ўтказдик. Таркибда ўзгаришлар рўй берди. Асосан тажрибали футзалчиларга суяндик. Жаҳон чемпионатига бормаган Жамолиддин Шарипов, Андрей Шлема сингари тажрибали футзалчилардан умидимиз катта эди. Айниқса, тўпурар футзалчимиз илк ўйиндаёқ ишончни оқлади. Жамолиддиннинг иккита голи терма жамоамизга ас қотди. Кейин тажрибали футболчи Зайниддин Тожиевни ҳам сафимизга қўшиб олдик. У ҳам жамоамизнинг ғалабасига ўз улушини қўшди, деб айта оламан.

- Бевосита ўйин ҳақида қандай фикрдасиз? Жамоавий ўйин панд бермадими? 

- Шу нарсани чўчигандим. Лекин йигитлар бир жамоа бўлиб ҳаракат қилишди. Ўйин мобайнида 3:1 ҳисобида олдинга чиқиб олгандик. Лекин сўнгги дақиқаларда ўтказиб юборган голлар сабаб асосий вақтда дуранг натижа қайд этилди. Экстра таймларда ҳам вазият ўзгармади. Пеналтилар сериясида Шлема ва Фахрутдинов ўзларини кўрсатишди. Ўз ўрнида дарвозабонимиз Акмал Хазратқулов ҳам рақиб футболчиларининг иккита зарбасини қайтаришга муваффақ бўлди. Шу тариқа, гуруҳ ғолиби сифатида чорак финалга чиқдик. Ярим финал чиптаси йўлидаги рақибимиз Афғонистон терма жамоаси бўлади. Бу жамоанинг Хитойга қарши ўйинини кўрдим. Ўйлайманки, пайшанба куни бўлиб ўтадиган учрашувда ғалаба биз томонда бўлади.

- Об-ҳаво қандай?

- Иссиқ ва намгарчилик юқори. Ўйин пайтлари нафас олиш қийин. Лекин футболчиларимиз маҳаллий иқлим шароитига мослашиб олишди.

- Ташкилотчилик қай даражада?

- Осиё ўйинлари бўлгани учун, ташкилотчилик борасида ҳеч қандай муаммо йўқ. Барча шароитлар яратилган. 

- Терма жамоамиз олдига аниқ мақсад қўйилганми?

- Совринли ўринлардан бирини қўлга киритишимиз керак. Бундан икки йил аввал Таиланднинг Пхукет шаҳрида ўтказилган Осиё ўйинларида бешинчи ўрин билан кифоялангандик. Бу сафар натижани яхшилашга ҳаракат қиламиз.

    Камолиддин АЛИМОВ суҳбатлашди