Алмати-Опен 2016. Костенко ғолиб, қизлар баҳсида Гулруҳбегим иккинчи

Илк бор ташкил этилган мусобақа амалдаги Қозоғистон чемпиони халқаро гроссмейстер Петр Костенконинг ғалабаси билан якунланди. 40 ёшли Костенко сўнгги 9-турда қора доналарда ўйнашига қарамай, пешқадам бўлиб келган Аристанбек Уразаевни мағлубиятга учратди.

Ҳамюртимиз Жўрабек Ҳамроқулов ҳам совринли ўринлардан бири қўлга киритиши мумкин эди. Лекин шахматчимиз сўнгги турда оқ доналарда ҳаракат қилишига қарамай, рейтингда ўзидан юқорида турувчи бельгиялик гроссмейстер Вадим Малахатко билан дуранг ўйнади.

Бирйўла 5 нафар иштирокчи Вадим Малахатко (Бельгия), Аристанбек Уразаев (Қозоғистон), Муҳаммад Хусанхўжаев (Тожикистон), Жўрабек Ҳамроқулов (Ўзбекистон) ва Торнике Саникидзе (Грузия) 7тадан очко жамғариб 2-6 –ўринларни банд этишди.

Ҳамюртимиз қўшимча кўрсаткичларга кўра кучли бешликдан жой олди. Аёллар ўртасида халқаро гроссмейстерлар қозоғистонлик Гулисхан Нахбаева ва ҳамюртимиз Гулруҳбегим Тоҳиржонова 6тадан очко жамғариб, энг яхши натижа қайд этишди.  

Қолган шахматчиларимиз ҳақида гапирадиган бўлсак, халқаро гроссмейстер Жаҳонгир Воҳидов 6 очко билан 14, Бобур Сатторов 19-ўринни эгаллади.