Ананд - рапид йўналишида жаҳон чемпиони, Қосимжонов эса...

King Salman World Rapid and Blitz Chess Championships мусобақасида 55 давлатдан 200 нафардан зиёд дунёнинг энг кучли гроссмейстерлари иштирок этяпти.  

Кеча жаҳон чемпионатида рапид, яъни тезкор шахмат бўйича баҳслар якунланди. Сўнгги турдан кейин уч нафар шахматчи ҳиндистонлик Вишванатан Ананд, россияликлар Владимир Федосеев ва Ян Непомняший 15 имкониятдан 10,5 очко жамғаришди.

Мусобақа регламентига кўра қўшимча кўрсаткичлари яхшироқ бўлган Ананд ва Федосеев ўртасида жаҳон чемпиони номини аниқлаш учун қўшимча тай-брейк ўйналди. Унда 1,5:0,5 ҳисобида ғалаба қозонган Вишванатан Ананд рапид, яъни тезкор йўналишда жаҳони чемпионига айланди.

Ҳиндистонлик шахматчи 250 000 доллар мукофот пулига ҳам эга бўлди. Федосеев кумуш, Ян Непомняший бронза медалини қўлга киритди. Ананд жаҳон тожи учун кураш давомида мағлубиятга учрамади. Тўққизинчи турда амалдаги жаҳон чемпиони Магнус Карлсенни ҳам мағлуб эта олди. Карлсен 10 очко билан 5-ўринни эгаллади.

Ҳамюртимиз Рустам Қосимжонов эса жаҳон чемпионатида 6та ғалабага эришди. Бешта партияда дурангга имзо чекди. Якунда 8,5 очко жамғариб, ўз рейтингини бироз бўлсада ошириб олишга эришди.