Aral marathon. Урганчда халқаро экологик марафон ўтказилди ФОТОГАЛЕРЕЯ

Мазкур конференция олдидан Ўзбекистон Экологик партияси ташаббуси билан Ўзбекистон Миллий олимпия қўмитаси, Жисмоний тарбия ва спорт, Ички ишлар, Мудофаа ва Маданият вазирликлари, Туризмни ривожлантириш давлат қўмитаси, Ўзбекистон миллий телерадиокомпанияси, Ўзбекистон енгил атлетика федерацияси, Ўзбекистон аэронавтика федерацияси ҳамкорлигида 17-22 октябрь кунлари Ўзбекистонда биринчи марта “Биз келажак учун жавобгармиз” шиори остида мамлакатимизнинг олти шаҳрида 5 километр масофага югуриш бўйича “Aral marathon” халқаро экологик марафони уюштирилмоқда. 

Бугун ана шу марафоннинг Урганч босқичи ўтказилди. Унда таълим муассасаларининг ўқувчи ва талабалари, давлат ва жамоат ташкилотлари вакиллари, спортсевар ёшлар ва фахрийлар, шунингдек, пойтахтимиздан ташриф буюрган марафончилар иштирок этишди. Ўз навбатида тадбир қатнашчилари Урганч халқаро аэропорти яқинидан буюк саркарда Жалолиддин Мангуберди хиёбонигача бўлган масофани босиб ўтишди.

- Бугун ўзига хос марафоннинг гувоҳига айландик, - дейди Хоразм вилояти жисмоний тарбия ва спорт бошқармаси бошлиғи Шокир Мадаминов. - Марафон қатнашчилари ўзлари билан сув солинган махсус идишни ҳам маррага етказишди. Табиийки, бу барчанинг эътиборини тортди. Бинобарин, марафоннинг ташкил этишдан мақсад, аҳолимиз ўртасида ҳаётимиз манбаи бўлган сув ресурсларини тежаб ишлатишни ва ундан самарали фойдаланишни тарғиб қилиш, шунингдек, табиатимизни асраб-авайлаш ва унга меҳр билан қараш ҳамда жойларда соғлом турмуш тарзини шакллантиришга қаратилган. Албатта, ушбу хайрли жараёнга улуш қўшаётганимиздан бениҳоя хурсандмиз.

Бинобарин, марафоннинг Урганч босқичи бўйича эркаклар ўртасида биринчи ўринни “Ватанпарвар” ташкилоти Хоразм вилояти техник ва амалий спорт турлари маркази спортчиси Одамбой Раҳимов эгаллади. Ушбу йўналишда иккинчи ўринни Спорт ўйинлари ва енгил атлетикага ихтисослаштирилган БЎСМ шуғулланувчиси Миржалол Кенжаев, учинчи ўринни Урганч давлат университети талабаси Абдулазиз Тиллаев банд этди. Аёллар орасида эса Урганч ихтисослаштирилган олимпия захиралари мактаб-интернати тарбияланувчиси Мунисахон Ҳайитбоева зафар қучди. Ушбу мактаб-интернати ўқувчиси Моҳичеҳра Бозорбоева иккинчи, Урганч давлат университети талабаси Рўзикажон Йўлдошева учинчи ўриндан жой олди.

Тадбирнинг тақдирлаш маросими Жалолиддин Мангуберди хиёбонида бўлиб ўтди. Унда “Биз келажак учун жавобгармиз” шиори остида ўтказилган “Aral marathon” халқаро экологик марафонининг ғолиб ва совриндорларига ташкилотчиларнинг қимматбаҳо совғалари топширилди.

Икром ХУДОЙБЕРГАНОВ, Урганч шаҳридан