Асадхўжа Мўйдинхўжаев уч карра Жаҳон чемпионига айланган илк ўзбекистонлик боксчи сифатида эълон қилинди

"Ҳа, қадрли бокс ихлосмандлари, 2025 йил боксимиз учун жуда ҳам омадли йил бўлди, десак янглишмаган бўламиз. Икки ташкилот ўтказган жаҳон чемпионатида вакилларимиз муносиб иштирок этиб, жаҳонда етакчи бокс мамлакати эканлигини яна бир бор исботлади. Рекордлар қайд этилди. Бу натижалар негадир камроқ эътироф этилди, назаримизда...

Ливерпулда бўлиб ўтган World Boxing ташкилотининг тарихий илк жаҳон чемпионатида эркаклар терма жамоамиз 6 та олтин медални қўлга киритиб, рекорд қайд этишди. 

Дубайда IBA ташкил этган жаҳон чемпионатида эса яна бир тарихий воқелик юз берди. Аниқроқ қилиб айтсак, Асадхўжа Мўйдинхўжаев катталар ўртасида 3 карра жаҳон чемпиони бўлган биринчи ўзбек боксчисига айланди. Ҳа, ундан ўзига хос "хет-трик". 

Бунга қадар, Руслан Чагаев 1997 ва 2001, Аббос Атоев 2007-2009, Баҳодир Жалолов 2019-2023, Абдумалик Халоков 2023-2025 ҳамда Ҳасанбой Дўсматов 2023-2025 йиллар икки маротаба олтин медални қўлга киритган эди. Асадхўжа Мўйдинхўжаев эса 2023 йил Тошкентда, 2025 йил ҳар икки ташкилот ўтказган жаҳон чемпионатида шоҳсупанинг энг юқори поғонасига кўтарилиб, ўзбек боксида ўзига хос тарих ёза олди. 

Дарвоқе, Олимпия дастуридан ўрин олган спорт турлари бўйича бу борада  4 талик довон забт этилди. Яъни, 3 карра жаҳон чемпиони бўлган ўзбекистонлик спортчилар 4 тага етди. Асадхўжадан аввал спорт гимнастикасининг афсонаси Оксана Чусовитина, оғир атлетикачиларимиз Руслан Нуриддинов ҳамда Акбар Жўраевлар 3 маротаба жаҳонда тенгсиз деб топилган эди. 

Демак, ўзбек спортида "покер!” Биз бу “хет-трик”, “покер”лар яқин йилларда “пента-трик”, "гекса-трик"ларга айланишига ишонамиз!", дейилади ташкилот хабарида.