"Бавария" футболчилари Нагельсман устидан шикоят қилишмоқда

"Бавария" футболчилари бош мураббий Юлиан Нагельсманндан норози.

Футболчиларнинг 35 ёшли мутахассис устидан учта асосий шикояти бор, деб хабар берди "Sport Bild".

Биринчидан, ўйин давомида муваффақиятли қарорларнинг йўқлиги. ўйинчиларнинг фикрича, Нагельсманн ўйин давомида вазиятни ўнглаш қобилиятига эга эмас. Бу футболчиларга "Бавария" якунда ғалабани бой берган "Боруссия" Дортмунд билан ўйиндан (2:2) сўнг аён бўлди.

Иккинчидан, ўйинчилар мураббий ўйин давомида қилаётган ўзгаришлардан ва таркиб нотўғри танлаётганидан чарчашган. Масалан, Нагельсманн Жамол Мусиала Чемпионлар Лигаси доирасидаги "Интер"га қарши ўйин (2:0)ни асосий таркибда бошлашини ваъда қилганди, аммо ярим ҳимоячи ўйинни захира ўриндиғидан бошлади.

Учинчидан, футболчилар Нагельсманнинг хатти-ҳаракатларидан норози. Мураббийнинг ўйинлар вақтида ўзини импульсив тутиб, уларни "бир кишилик театр"га айлантириши ёқмаяпти.

Шу билан бирга, футболчилар Юлиан айрим жиҳатларда ривожланиб борётганини айтишмоқда. У ўйинчилар билан тез-тез индивидуал суҳбат қилмоқда ва уларни омма олдида ҳимоя қиляпти.