Бугун ғалаба қозонган Фазлиддиннинг навбатдаги рақиби, жанг санаси ва манзили маълум

Машҳур промоутер Боб Арумга тегишли Top Rank промоутерлик компанияси мижози бўлган ҳамюртимиз АҚШнинг Аризона штати Тусон шаҳрида мексикалик Виктор Росасни 80:72, 80:72, 80:72 ҳисобида мағлуб этганди. 

Эътиборлиси, Ғоибназаровнинг навбатдаги жанги қачон, қаерда ва хатто кимга қарши ўтказилиши ҳам маълум бўлди. Унга кўра, боксчимиз 9 декабрь куни АҚШнинг Нью-Йорк шаҳридаги ўз бағрига 5 500 томошабинни сиғдира олувчи муҳташам Madison Square Garden аренасида рингга кўтарилади. 

Фазлиддиннинг профессионал рингдаги тўртинчи рақиби мексикалик Алексис Дел Боске бўлади. 22 ёшли Боске фаолияти давомида 17 та жанг ўтказиб, шуларнинг 13 тасида ғалабага эришган. Тўққизта жангда рақибларини нокаутга учратган. Тўрт бор мағлуб бўлган. Битта жангда нокаутга учраган. 

Кўриниб турибдики, Ғоибназаровнинг рақиби анча жиддий боксчи. У сўнгги бор шу йилнинг 30 июнь куни жанг ўтказган ва америкалик Рамо Ассенсиони нокаутга учратган эди. 

Маълумот учун, 9 декабрь кунги бокс оқшомининг марказий жанги Василий Ломаченко иштирокида ўтказилади. Украиналик 29 ёшли боксчи кубалик 36 ёшли Гильермо Ригондога қарши рингга кўтарилади. Жанг биринчи енгил вазн (59 кг) тоифасида ўтказилиб, ўртага Ломаченкога тегишли WBO чемпионлик камари қўйилади.