Бугун Истомин Астанада япониялик теннисчига қарши кортга чиқади

Соврин жамғармаси 100 минг АҚШ долларини ташкил қилувчи ушбу “Челленжер” турнирида ҳамюртимиз иккинчи рақам остида таснифланган. Бугун Денис яккалик баҳсларининг иккинчи даврасида япониялик 30 ёшли Юя Кибига қарши кортга чиқади. Киби дунё рейтингида 361-ўринни эгаллаб турибди.

Маълумот учун, Денис илк давра учрашувида Хитой Тайпейи вакили Ти Ченни мағлубиятга учратганди. Россиялик Евгений Донской Астана “Челленжери”да биринчи рақам остида ҳаракат қиляпти. Ушбу турнирда яна бир ҳамюртимиз Санжар Файзиев ҳам ўз имкониятини синовдан ўтказаётганди. Саралаш баҳслари орқали асосий тўрга етиб келган Санжар илк босқичда хитойлик Же Лига имкониятни бой берган.

Мусобақа ғолиби 14,400 доллар мукофот пули ҳамда роппа-роса 100 рейтинг очкосига эга бўлади. Финалчи эса 8,480 доллар ҳамда 60 рейтинг очкосини ўз ҳисобига қўшиб қўяди.