Бугун тарихий кун! Уч теннис маликамиз Уимблдон асосий тўридаги иштирокини бошлайди

Бугун Лондон шаҳрида теннис бўйича "Катта Дубулға" туркумига кирувчи, умумий мукофот жамғармаси 86 миллион долларни ташкил этувчи Уимблдон турнирининг асосий тўр баҳслари бошланади ҳамда эркаклар ва аёллар мусобақасининг ҳар бирида 128 нафардан теннисчи бош соврин учун курашга киришади.  

Қувонарлиси, тарихда илк бор Ўзбекистоннинг бир йўла уч теннис маликаси "Катта Дубулға" турнирининг асосий тўрида иштирок этади ва уларнинг уччаласи ҳам бугун биринчи давра учрашувида кортга чиқади. Биринчи ракеткамиз Камилла Раҳимова 1/64 финалда украиналик Ангелина Калининага қарши баҳс олиб боради. Ушбу баҳс бизнинг вақт билан соат 15:00да бошланади. Раҳимова айни пайтда дунёнинг 70, Калинина эса 66-ракеткаси бўлиб турибди. 

Иккинчи ракеткамиз Мария Тимофеева биринчи даврада бразилиялик Беатрис Хаддад Майяга қарши кортга чиқади. Мария WTA рейтингида 95, Беатрис 134-ўриндан жой олган. Ушбу учрашув соат 17:00да бошланади. 

Ҳозирда WTA рейтингида 113-поғонада бораётган мамлакатимизнинг учинчи ракеткаси Полина Кудерметова эса 1/64 финалда дунёнинг 41-ракеткаси, россиялик Людмила Самсонова билан ҳисоб-китоб қилади. Бу тўқнашув соат 20:30да старт олиши белгиланган.