Бугун Тошкентда бокс оқшоми ўтказилади, марказий жангда жаҳон чемпиони рингга чиқади

Ўзбекистон профессионал бокс федерацияси томонидан ўтказилаётган бокс оқшомидан бир нечта жанглар ўрин олган. Унда юртимиз чарм қўлқоп усталаридан ташқари Россия, Қирғизистон ва Вьетнам давлатидан келган боксчилар ҳам рингга чиқишади.

Оқшомнинг марказий жанги ярим ўрта вазн тоифасида фаолиятини давом эттираётган ҳамюртимиз Жамшид Нажмиддинов иштирокида бўлиб ўтади. Унинг рақиби фарғоналик боксчи Шерхон Машрабжонов бўлади. Кеча боксчилар тарозидан ўтиш маросимида иштирок этишди. 

Эслатиб ўтамиз, Нажмиддинов яқинда Қозоғистоннинг Алмати шаҳрида WFA (World Fighting Assotiation) жаҳон чемпионлик камари учун рингга чиққан ва индонезиялик Херо Титони мағлубиятга учратган эди.

Маълумот учун, Нажмиддинов бугунгача 17та жанг ўтказган ва уларнинг 16тасида ғалаба қозонган. Фаолиятидаги ягона мағлубиятини шу йилнинг 16 сентябрь куни Киев шаҳрида ҳакамларнинг хатоси туфайли украиналик собиқ WBC чемпиони Виктор Постолдан қабул қилиб олганди.