Бугун ёш шахматчимиз Минск турниридаги иштирокини бошлайди

Ушбу мусобақада юртимиз шарафини ФИДЕ устаси Ортиқ Ниғматов ҳимоя қилади. Ёш шахматчимиз яқинда пойтахтимизда ўтган Ўзбекистоннинг биринчи гроссмейстери Георгий Агзамов хотирасига бағишланган “Тошкент-Опен 2018” халқаро турнирида кумуш медални қўлга киритганди. 

Минск турнири швейцарча тизимда ўтказилиб, 11 турдан иборат бўлади. Ғолиб шахматчи 2000 АҚШ доллари ва кубокни қўлга киритади.Кучли олтиликдан жой олган шахматчиларга пул мукофоти таъсис этилган.

Халқаро турнирда 7 давлатдан жами 96 нафар иштирокчи дона суради. Халқаро гроссмейстерлар - Антон Коробов (Украина, 2736), Дмитрий Андрейкин (Россия, 2733), Сергей Жигалко (Беларусь, 2724), Рауф Мамедов (Озарбайжон, 2711) сингари шахмат юлдузларининг иштирок этаётгани мусобақа нуфузидан дарак бериб турибди.