Бунгача қайси мамлакатларда Президентлар МОҚ раҳбари бўлган?

Бу воқеа оламшумул янгилик сифатида кенг тарқалиши билан бир қаторда, кўплаб саволларни ҳам келтириб чиқарди. Давлат раҳбари МОҚни бошқаришга ҳақлими? ХОҚ бунинг учун Ўзбекистон томонига нисбатан қандайдир чора кўрмайдими ва ҳ.к. 

Шуни айтиш керакки, давлат раҳбарининг ўз давлатида Миллий Олимпия қўмитасини бошқариши янгилик эмас. Айни пайтда Озарбайжон Президенти Илҳом Алиев ўз мамлакатининг Миллий Олимпия қўмитасига раҳбарлик қилади. Тўғри, Илҳом Ҳайдарович бу лавозимга ҳали Президент бўлмаган пайтида сайланган ва шундан бери узлуксиз Озарбайжон МОҚни бошқариб келади. Бундан ташқари, Тожикистон Президенти Имомали Раҳмон ҳам Олимпия қўмитаси раиси саналади. Ўз вақтида Беларусь Президенти Александр Лукашенко, ён қўшнимиз Туркманистон раҳбарлари - Сапармурод Ниёзов ва Гурбангули Бердимуҳамедовлар ҳам шундай лавозимга лойиқ кўрилишган. 

"Бундай ҳолат фақат собиқ СССР Республикаларида бўлганми?" десангиз "йўқ" деб жавоб бераман. Шарқ ва ғарб давлатларида ҳам бу каби ҳолатлар учраб туради. Масалан, Индонезиянинг илк Президенти Сукарно, Монако қироли Алберт II ва бошқалар ҳам ўз мамлакатида Олимпия қўмитасига раҳбарлик қилишган. Бу рўйхатга яна Кубанинг собиқ раҳбари Фидел Кастрони ҳам қўшсак бўлади. Гарчи дон Кастро расман Олимпия қўмитаси раиси бўлиб ишламаган бўлсада, амалда Куба МОҚни бошқарган. 

Хуллас, Ўзбекистон Республикаси Президенти Шавкат Мирзиёевнинг мамлакат Миллий Олимпия қўмитасига раис этиб сайланишида ҳеч қандай қоидалар бузилиши ҳолатлари йўқ ва бу ўзгариш фақат ўзбек спорти ривожига хизмат қилишига ишонаман.

Отабек Эшмаматов