Жавоҳир Синдаров ҳам Жаҳон кубоги 1/2 финалида! Финал чиптаси учун ўзбек дербисига гувоҳ бўламиз!

Ҳиндистоннинг Гоа шаҳрида давом этаётган шахмат бўйича умумий мукофот жамғармаси 2 миллион АҚШ долларини ташкил қилувчи Жаҳон кубогида 1/2 финалчилар аниқланди. Дунёнинг 206 нафар шахматчиси иштирокида бошланган нуфузли мусобақада бугун 1/4 финалнинг ҳал қилувчи тай-брек ўйинлари ўтказилди. 

Гроссмейстеримиз Нодирбек Якуббоев 1/4 финалнинг асосий партияларининг ўзида германиялик Александр Донченкони 1,5:0,5 ҳисобида мағлубиятга учратиб, Жаҳон кубогининг 1/2 финалига йўл олганди.  

Бугун бу вазифани 19 ёшли Жавоҳир Синдаров ҳам уддалади. Мескикалик Хосе Мартинес Алькантарага қарши кечган асосий партияларда дуранг натижа қайд этилганди. Бугунги тай-брекнинг дастлабки икки партиясида ҳам томонлар 1 тадан ғалабага эришишди. Навбат 10+10 форматдаги тай-брекка етди. Унинг биринчи партиясида кучлир тенг келди. Иккинчи партияда оқ доналарда ўйнаган Синдаров Мартинесни мағлубиятга учратди. 

Умумий ҳисоб 3,5:2,5 га етди, Жавоҳир 1/2 финалда! Синдаров бу ғалабаси эвазига ярим финалга чиқиш баробарида Нодирбек Абдусатторов учун ҳам "ўч" олди. Турнир кашфиётига айланган мексикалик шахматчи учинчи босқичда Нодирбек Абдусатторовни мағлубиятга учратганди. 

Эътиборлиси, энди 1/2 финалда ўзига хос ўзбек дербисига гувоҳ бўламиз. Жавоҳир Синдаров Нодирбек Якуббоевга қарши ҳам финал, ҳам Жаҳон тожи учун Даъвогарлар турнири чиптаси учун дона суради. Ғолиб шахматчи йўлланмага эга бўлади. Мағлуб гроссмейстер эса 3-ўрин учун баҳсда бу имкониятдан яна фойдаланиб кўради. Яъни, Даъвогарлар турнирига аниқ бир шахматчимиз йўлланмани қўлга киритади. Иккинчисида ҳам охиригача имконият сақланиб қолади. 

Яна бир қизиқ томони шундаки, Ҳиндистонда ўтказилаётган ушбу нуфузли турнирнинг 1/2 финалига келиб, биронта ҳам ҳинд шахматчиси қолмади. Мезбонларнинг сўнгги вакили Аржун Эригаиси 1/4 финалда хитойлик Вей И томонидан мағлуб этилди.     

Жаҳон Кубоги. 1/4 финал натижалари

Нодирбек Якуббоев — Александр Донченко - 1,5:0,5

Андрей Есипенко — Сэм Шанкленд - 4:2

Вэй И — Аржун Эригайси - 2,5:1,5

Жавоҳир Синдаров — Хосе Мартинес - 3,5:2,5