Бутунжаҳон кўчманчи халқлар ўйинларида яна бешта медаль қўлга киритилди

Дунёнинг 41 давлатидан 54 нафар спортчи иштирок этган аширтмали аба гюлеши (Туркия кураши) бўйича ўтказилган баҳсларда вакилларимиз Алишер Худойбердиев (-80 кг) олтин, Ислом Носиров мутлақ вазн тоифасида бронза медалини қўлга киритди. Гюлеш (Азарбайжон кураши) бўйича ўтказилган ўйинларда юртдошимиз Шерали Шодмонов (-80 кг) бронза медалига сазовор бўлди.

Шунингдек, кеча, 6 сентябрь куни ўтказилган кўпкари бўйича ярим финал баҳсларида Ўзбекистон терма жамоаси Қозоғистон жамоаси устидан 5:4 ҳисобида ғалаба қозониб, финал йўлланмасини қўлга киритди. Финал баҳслари бугун, Тошкент вақти билан 17:00да Чўлпон-Ота шаҳридаги “Ипподром” аренасида ўтказилиб, унда вакилларимиз мезбон Қирғизистон жамоаси билан беллашадилар.

Бугун, 7 сентябрь куни спортчиларимиз кураш ва самбо турлари бўйича ҳам баҳсларга киришишди ва дастлабки натижалар қайд этилди. Кураш бўйича жамоамиз аъзолари Мухриддин Тиловов (-66кг) ва Темурхон Тўраев (-81 кг) ўйинларнинг олтин медалини қўлга киритишди.

Эслатиб ўтамиз, 2 сентябрдан 8 сентябрга қадар давом этадиган мазкур мусобақада дунёнинг 66 давлатидан ташриф буюрган спортчилар 50 та спорт тури бўйича 500 дан ортиқ медаллар жамланмаси учун баҳс олиб бормоқда. Ўзбекистон делегацияси 13 та спорт тури бўйича 58 нафар спортчи билан илк бор расман иштирок этмоқда.