Бутунжаҳон шахмат Олимпиадасида ўсмирларимиз муваффақиятли одимлашмоқда

Ушбу мусобақада Саидали Йўлдошев мураббийлиги остида ёш шахматчиларимиз Нодирбек Ёқуббоев, Нодирбек Абдусатторов, Жавоҳир Синдоров, Шамсиддин Воҳидов ва Ситора Сапаровалар юртимиз шарафини ҳимоя қилишмоқда.

Ўзбекистон терма жамоаси биринчи турда Венгрия термасини 4-0 ҳисобида мағлуб этди. Нодирбек Абдусатторов (2560) биринчи доскада Ференц Комбочни (2290) таслим қилган бўлса, Нодирбек Ёқуббоев (2549) иккинчи доскада Эндре Счикини (2282) мағлуб эта олди. Жавоҳир Синдоров (2513) учинчи доскада Марсель Борхи (2201) устидан зафар қучди. Ситора Сапарова (1848) тўртинчи доскада рейтинг бўйича ўзидан анча кучли рақиби Агостон Юхасни (2139) мағлубиятга учратди.

Иккинчи турда эса шахматчиларимиз Польша термасини 3-1 ҳисобида таслим этишди. Нодирбек Абдусатторов (2560) биринчи доскада қора доналарда Якуб Косаковскини (2413) таслим этди. Нодирбек Ёқуббоев (2549) иккинчи доскада оқ доналарда Косма Пасан-Милехни (2334) ортда қолдирди. Шамсиддин Воҳидов (2456) учинчи доскада ўзининг илк партиясида ғалаба қозонди. У Миеско Мис (2307) устидан зафар қучди. Ситора Сапарова (1848) тўртинчи доскада оқ доналарда Мария Маличкага (2013) имкониятни бой бериб қўйди. Учинчи раундда Молдова терма жамоасини 3,5-0,5 ҳисобида мағлубиятга учратилди. Тўртинчи турда вакилларимиз америкалик рақибларига 1,5 - 2,5 ҳисобида имкониятни бой бериб қўйдилар.

Энди ҳамюртларимиз бешинчи тур ўйинларини Россия терма жамоасига қарши ўтказадилар.