Чироқчида Ўзбекистон чемпионати бошланди

Ўзбекистон Республикаси жисмоний тарбия ва спорт вазирлиги ҳамда Ўзбекистон миллий белбоғли кураш федерациясининг йиллик тақвим-режасига мувофиқ ўтказилаётган мазкур мамлакат чемпионатида Қорақалпоғистон Республикаси, Тошкент шаҳри ва вилоятлардан 300 нафарга яқин  сара полвонлар иштирок этмоқда. 

Чироқчидаги 1-сонли болалар-ўсмирлар спорт мактаби мезбонлик қилаётган мусобақа регламентига кўра эркаклар белбоғли курашнинг классик ва эркин йўналишида 11, аёллар эса эркин йўналишнинг 7 та вазн тоифасида кураш тушишмоқда.

Бугун дастлаб, чемпионатнинг тантанали очилиш маросими ташкил этилди.   Спортчилар, ҳакамлар ва мураббийлар, мухлислар, ОАВ вакиллари, кенг жамоатчилик йиғилган ушбу маросимда сўз олган туман ҳокимининг ўринбосари Эркин Бобоқулов, Ўзбекистон миллий белбоғли кураш федерацияси раиси Равшан Дастиров, халқаро белбоғли кураш федерацияси (Борьба на поясах) спорт директори, россиялик Венер Гайнулин, вилоят белбоғли кураш федерацияси раиси Фарҳод Жуманов ва бошқалар бугун мамлакатимизда жисмоний тарбия ва спортга, хусусан, миллий спорт турларимизга бўлган юксак эътибор боис, спортчиларимизнинг халқаро мусобақаларда юртимиз шаънини муносиб ҳимоя қилаётгани хусусида таъкидлаб ўтишди ва барча спортчиларга беллашувда омад ёр бўлишини тилашди.  

Шундан сўнг таниқли ва хушовоз хонанда Сарвар Абдуллаев томонидан куйланган дилтортар қўшиқлар очилиш маросимига янаям ўзгача кўтарингкилик бағишлади. Тадбир якунига етгач, полвонларнинг беллашувларига старт берилди. Мусобақалар давом этади.

Илҳом РАҲМОНОВ тайёрлади