Davis Cup. Алькаразда коронавирус аниқланди. Энди у терма жамоасига ёрдам беролмайди

Алькаразнинг бугун Эквадорга қарши "А" гуруҳида ўйнаши кутилганди. Шу тариқа, Пабло Каррена-Буста ва Алберто Рамос Испания терма жамоаси сафида гуруҳ босқичининг яккалик баҳсида иштирок этади.

Эслатиб ўтамиз, Испания терма жамоасининг рақиблари Россия ва Эквадор терма жамоалари ҳисобланади. Карлос Алькараз Рафаэль Надалнинг издоши ҳамда "Дэвис Кубоги" финалида Испаниянинг энг номдор теннисчиси сифатида эътироф этилган эди.

"Дэвис Кубоги"да илк бор иштирок этмоқчи бўлган 18 ёшли Алькараз ижтимоий тармоқларда бу каби муҳим ва алоҳида турнирни ўтказиб юборганидан афсусда эканлигини айтди.

"Мадридда, ўз ватанимда, мухлисларимиз кўз олдида ўйнашимдан жуда ҳаяжонда эдим", - деди у. - Аммо баъзида барчаси биз хоҳлагандек бўлмайди ва сиз буни енгиб ўтишингиз керак. Бу жуда оғир зарба, лекин мен ўзимга келишим, кучлироқ бўлишим зарур", - деди Алькараз.

Аввалроқ, Халқаро теннис федерацияси Испания терма жамоаси аъзоси коронавирусга чалингани ва изоляцияга олингани ҳақида маълум қилган эди. Бироқ теннисчининг исми ошкор этилмаганди. Испания жамоасининг қолган аъзолари янги ПЦР тестини топширишади.

АТР рейтингида 32-ўринни эгаллаб турган Алькаразнинг ўрнини жаҳоннинг 60-ракеткаси Педро Мартинес эгаллайди. 

Испания терма жамоасининг таркиби қуйидагича: Пабло Каррено Буста, Алберто Рамос-Винолас, Феличиано Лопес, Марсель Гранолльерс. Жамоа сардори - Серхи Бругуэра.

Испания жароҳати туфайли аллақачон Надалсиз қолган эди. Бу ҳафта бошида эса жароҳати туфайли жаҳоннинг 19-ракеткаси Роберто Баутиста Агутни йўқотди.

Маълумот учун, Мадрид, Инсбрук ва Турин шаҳарларида ўтказилаётган "Дэвис Кубоги" турнирининг амалдаги ғолиб Испания терма жамоаси ҳисобланади.