Дубов - рапидда жаҳон чемпиони, шахматчиларимиз ТОП-50га кира олишмади

Эркаклар ўртасидаги баҳсларда уч нафар истеъдодли ёш шахматчиларимиз ҳам иштирок этишди. Умумий мукофот жамғармаси 1 150 000 АҚШ долларини ташкил қилувчи жаҳон чемпионатининг рапид йўналишида кеча бир нечта тур учрашувлари ўтказилиб, мусобақага якун ясалди. 

Ҳамюртларимиздан энг яхши натижага амалдаги жаҳон чемпиони норвегиялик Магнус Карлсенни мағлубиятга учратган халқаро мастер Шамсиддин Воҳидов эришди. Ёш шахматчимиз 15 имкониятдан 8,5 очко жамғариб, 53-58 ўринларни банд этди. У жаҳон чемпионатида рейтингда ўзидан юқорида турган халқаро гроссмейстерларни мағлуб этишнинг уддасидан чиқди. Шамсиддинов сўнгги 15-партияда россиялик Михаил Демидовни мағлуб этди. 

Ёш гроссмейстеримиз Нодирбек Абдусатторов 15 имкониятдан 8 очко жамғарди. У қўшимча коэфицентларга кўра 69-83 поғоналар орасида жойлашди. Жаҳоннинг энг ёш тўртинчи халқаро гроссмейстери бўлиб турган Нодирбек сўнгги турда қора доналарда ўйнашига қарамай, испаниялик машҳур халқаро гроссмейстер Франциско Вальехо билан муросага келди. 

Яна бир ҳамюртимиз Нодирбек Ёқуббоев эса 7,5 очко билан 93-96 поғоналар орасидан жой олди. Ёқуббоев сўнгги 15-партияда арманистонлик халқаро гроссмейстер Арам Хакобян билан дурангга имзо чекди. 

Рапид бўйича жаҳон чемпионати кутилмаган натижа билан якунланди. Якунда 15 имкониятдан 11 очко жамғарган россиялик гроссмейстер Данил Дубов жаҳон чемпионига айланди. У сўнгги турда озарбайжонлик Шахрияр Мамадияров билан дуранг ўйнади. Оқ доналарда ҳаракат қилган Мамадияров ғалаба қозонганида, айнан у жаҳон чемпиони бўлар эди. 

Чемпиондан ярим очко кам жамғарган Шахрияр қўшимча кўрсаткичларга кўра иккинчи ўринни эгаллади. Америкалик Хикару Накамура эса кучли учликка якун ясади. Владислав Артемьев (Россия) ва Магнус Карлсен (Норвегия) ҳам кучли учликдаги гроссмейстерлар сингари 10,5тадан очко тўплашди.