11 июн 09:20
Янгиликлар
Бокс/ММА
Фазлиддин Ғоибназаровнинг навбатдаги жанги санаси ва манзили маълум
Профессионал боксда фаолиятини муваффақиятли давом эттираётган ҳамюртимиз Фазлиддин Ғоибназаровнинг навбатдаги жанги қачон ва қаерда ўтказилиши маълум бўлди.
Рио-2016 Олимпиадаси чемпиони учун бу ҳисоб бўйича профессионал боксдаги учинчи жанг бўлади. Бўлажак жанг 5 август куни АҚШнинг Лос-Анжелес шаҳрида ўтказилади. Ҳозирча рақиб номи маълум эмас. Тез кунда бунга ойдинлик киритилади.
Шуниси аниқки, оқшомнинг марказий жанги украиналик жаҳон чемпиони Василий Ломаченко иштирокида бўлиб ўтади. Фазлиддин Ғоибназаров афсонавий промоутер Боб Арумга тегишли Top Rank промоутерлик компанияси мижози ҳисобланади.
Маълумот учун, ҳамюртимиз 20 май куни АҚШнинг Нью-Йорк шаҳридаги дунёга машҳур “Мэдисон Сквер Гарден” аренасида рингга америкалик Агустин Маурасни мағлубиятга учратган эди.
Ҳавола :
Манба : olamsport.com
Фикрлар