ФОТО. Нажмиддинов vs Постол: Боксчилар тарозига чиқишди ва уларнинг фикрлари

Оқшомнинг марказий жанги ҳамюртимиз иштирокида бўлиб ўтади. Фаолиятида мағлубият нималигини билмай келаётган Жамшид Нажмиддинов ярим ўрта вазн тоифасида собиқ WBC чемпиони украиналик Виктор Постолга қарши рингга кўтарилади.

Кеча боксчиларни тарозидан ўтказиш маросими бўлиб ўтди. Ҳар икки боксчи белгиланган вазн (63,5 кг) меъёрини бажаришди. Бугунги жанг 10 раунддан иборат бўлади. Ғолиб боксчи кейинчалик чемпионлик камарига даъвогарлик қилиши мумкин.

Виктор Постол: “Рақиб оддий боксчи эмас. У чапақай ва бу ҳолат менга ноқулайлик туғдиради. Шундай бўлсада, жангда ғалаба қозониб, аввалги мавқейимга қайтишга ҳаракат қиламан. Мен яна жаҳон чемпиони бўлишни мақсад қилганман”.

Жамшид Нажмиддинов: “Бу менга берилган ажойиб имконият. Агар жангда ғалаба қозонсам, дунё бокс оламида кўпчиликни ўзимга қарата оламан. Рақибим анча номдор. Жаҳон чемпиони бўлишга эришган. Шунга қарамай, Киевдан ғалаба билан қайтишга ҳаракат қиламан”.