ФОТО. Рио-2016 қаҳрамони бўлган боксчиларимиз футболчилар билан учрашишди

Тадбирда Рио Олимпиадаси қаҳрамонлари айнан олимпия ўйинлари ҳамда Тошкентда ўтган Осиё чемпионатидаги ҳаяжонли дақиқалар, мусобақаларга тайёргарлик жараёни, ғалаба ва мағлубиятни тўғри ҳис қилиш каби мавзулар бўйича сўзлаб беришди. 

Бокс бўйича терма жамоа мураббийларидан бири Раҳматжон Рўзиохунов ҳам сўзга чиқиб, боксчиларнинг ҳаммаси футбол мухлиси эканлигини алоҳида таъкидлади. Маросимда боксчилардан Шаҳрам Ғиёсов, Бектемир Мелиқўзиев, Баҳодир Жалолов, Муроджон Аҳмадалиев, Исроил Мадримов ва Элнур Абдураимовлар иштирок этишди.

Сўзга чиққан Шаҳрам Ғиёсов ва Исроил Мадримов футболчиларга катта мусобақалардаги тажрибалари ҳақида гапириб, Ўзбекистон терма жамоасига Эрон билан бўлиб ўтадиган ҳал қилувчи ўйинда омад тиладилар. 

Футболчилар номидан сўзга чиққан терма жамоа сардори Одил Аҳмедов ҳам боксчиларга ташриф учун миннатдорчилик билдириб, бундан кейинги мусобақаларда ғалабалар бардавом бўлишини тилади.