Ғоибназаров бу йил ҳисобидан яна иккита жанг ўтказмоқчи

Рио Олимпиадаси чемпиони 8 раундга мўлжалланган жангда америкалик рақиби Кевин Жонсонни 78:74 ҳисобида мағлуб этди. Биз ушбу жангдан сўнг боксчимизнинг мураббийи Аброр Турсунпўлатовнинг фикрлари билан қизиқдик. 

"Бугунги жанг биз кутгандан ҳам қийин кечди. Рақиб жисмоний томондан кучли тайёргарликка эга экан. Буни у бутун жанг давомида кучли зарбаларни кўтара олиши билан исботлади. Бу ҳолат эса ўз-ўзидан Фазлиддиннинг асабийлашишига сабаб бўлди. 

Энг муҳими, жангни ғалаба билан якунлаб олдик. Келаётган пайшанба куни Ғоибназаров Тошкентга учади. Мен эса шу ерда қолиб Сергей Ковалёвни 4 август куни ўтказиладиган чемпионлик ҳимоя жангига тайёрлайман. Сергей колумбиялик Элейдер Альваресга қарши рингга чиқади. ЖангАтлантик-Сити шаҳридаги Hard Rock Hotel & Casino очиқ аренасида бўлиб ўтади.  

Режамизга кўра Фазлиддин шу йил охиригача яна иккита жанг ўтказиши керак. Буни биз промоутерлар билан биргаликда муҳокама қилиб, энг мақбул вариантни танлаймиз. Чемпионлик камари учун ҳали камида 2-3та жанг ўтказишимиз керак бўлади", - деди Турсунпўлатов.