05 сен 15:27
Янгиликлар

Бокс/ММА

Головкин - Канело 2 жангида The Ring камарининг янги соҳиби аниқланади

Дунёга машҳур The Ring журналининг эксперт гуруҳи 15 сентябрь кунига белгиланган супержанг ғолиби янги чемпионлик камарига эга бўлишини маълум қилди.

Хабарингиз бор, 15 сентябрь куни ўрта вазн тоифасида WBA ва WBC йўналишлари чемпиони қозоғистонлик Геннадий Головкин мексикалик даъвогар Сауль “Канело” Альваресга қарши такрорий жангда рингга кўтарилади.

Ғолиб боксчи ўрта вазнда The Ring чемпионлик камарининг янги соҳибига айланади. Аслида қоидага кўра The Ring чемпионлик камари рейтингда биринчи ва иккинчи ўринни эгаллаб турган боксчилар ўртасидаги жанг ғолибига тақдим этиларди.

Лекин экспертлар гуруҳи жангнинг муҳимлик нуқтаи назаридан келиб чиқиб, ушбу жанг ғолибига ҳам чемпионлик камари тақдим этилишини ошкор этишди. Ҳозирда Головкин рейтингда биринчи ўринни эгаллаб турибди. Альварес эса допингга тушиб қолгани боис айнан The Ring чемпионлик камаридан маҳрум қилинган эди.