Гулруҳбегим Гибралтардаги кучли турнирда иштирок этяпти

Анъанавий тарзда ҳар йили ўтказиб келинадиган “Gibraltar chess festival 2019” мусобақасида дунёнинг кучли гроссмейстерлари ва улар қаторида ҳамюртимиз, халқаро аёллар гроссмейстери Гулруҳбегим Тоҳиржонова (2446) ҳам иштирок этяпти.  

Иштирокчилар орасида Максим Вашье-Лаграв (Франция, 2781), Левон Аронян (Арманистон, 2765), Уэсли Со (АҚШ, 2765), Хикару Накамура (АҚШ 2746), Цзюй Вэньцзюнь (Хитой, 2575), Анна Музичук (Украина, 2569), Катерина Лагно (Россия 2560) каби халқаро гроссмейстерлар, жаҳон чемпионларининг борлиги мусобақа нуфузидан дарак бериб турибди. 

Ҳозирча сўнггиси бўлиб турган олтинчи партияда Гулруҳбегим Тоҳиржонова оқ доналарда голландиялик халқаро мастер Уэллинг Жеррардни мағлубиятга учратиб, очколар сонини 3,5тага етказиб олди. Бугун ҳамюртимиз 7-турда ўзи сингари 3,5 очкга эга бўлиб турган россиялик халқаро гроссмейстер Даниил Юффа (2578)га қарши қора доналарда ҳаракат қилади.  

Бугунги ўйинлар олдидан турнир жадвалида 5тадан очко жамғарган чехиялик Давид Навара (2738), швециялик Нилс Гранделиус (2682), россиялик Владислав Артемьев (2709), арманистонлик Левон Аронян (2767), вьетнамлик Ле Куанг Льем (2714), хорватиялик Иван Сарич (2690), ҳиндистонлик Адхибан (2689) ҳамда америкалик Хикару Накамура (2749) қўшҳокимлик қилишяпти.