Ҳулкар Тоҳиржонова Гулруҳбегимнинг АҚШга кетиши, фуқаролик ва федерация муносабати ҳақидаги саволларга жавоб берди

Сайтимиз мухбири ушбу масалага аниқлик киритиш мақсадида шахматчимизнинг опаси Ҳулкар Тоҳиржонова билан қисқа интервью ташкил этди.

"Гулруҳбегим ҳозир АҚШдаги Миссури университети жамоаси шарафини ҳимоя қилмоқда. Агар халқаро мусобақаларда иштирок этадиган бўлса, АҚШ номидан дона суради. У айни пайтда клуби билан бирга клублар ўртасидаги Европа чемпионатида ўйнамоқда. (Европада ҳам клуб шарафини ҳимоя қилади - Olamsport) 

Айни пайтда унга кўплаб мурожаатлар бўлмоқда. Турнирда иштирок этаётгани сабабли саволларга жавоб бера олмаяпти.

- У Америка Қўшма Штатлари фуқаролигини олдими?

- Йўқ, фуқаролик олингани йўқ. Фақатгина федерация ўзгарди. У Ўзбекистон фуқароси. 

- Ушбу таклифни қабул қилишига нима сабаб бўлди?

- Бунга сабаблар кўп. Бу ҳақида омма олдида шов-шув қилмоқчи эмасдик. Биз фақатгина Ўзбекистон учун ўйнаганмиз. Асосий қарорни ўзи қабул қилди. Дадам, опам ва мен бунга қаршилик қилмадик. Гапирса гап кўп. Шу тўғри қарор деб ҳисобладик. 

- Ўзбекистон шахмат федерацияси бунга муносабат билдирдими?

- Йўқ, федерация томонидан бунга хеч қандай расмий муносабат бўлгани йўқ. Биз ўз ишимизни давом эттиряпмиз, "Sky Chess" клуби фаолият олиб бормоқда. Анча йиллардан буён терма жамоада ўйнамаяпмиз. Уччаламизни ҳам терма жамоадан чиқариб юборишган. (Изоҳ - Нафиса Мўминова, Ҳулкар Тоҳиржонова ва Гулруҳбегим Тоҳиржонова назарда тутилмоқда - Olamsport).

Опам ҳам Европа клуби таркибида онлайн мусобақада иштирок этмоқда.