Ҳулкар Тоҳиржонова: "Venkon Cup"ни халқаро турнирга айлантирмоқчимиз"

Эртага эса турнир доирасида гроссмейстерлар ўзаро беллашадилар.

Ўсмирлар ўртасидаги баҳслар якунланганидан сўнг биз турнир ташкилотчиларидан бири ҳисобланган Ҳулкар Тоҳиржонованинг фикрлари билан қизиқдик.

"Ушбу турниримиз иккинчи маротаба ўтказилмоқда. Ўтган йили бўлиб ўтган илк мусобақада асосан Тошкент шаҳридаги болакайлар иштирок этгандилар. Бу сафар эса Республикамизнинг бошқа вилоятларидан ҳам шахматчилар ташриф буюрдилар.

"Venkon Cup" турнирини бемалол халқаро мусобақа деб айтишим мумкин. Чунки, тезкор шахмат баҳсларида Франция, Қозоғистон ва Мисрдан ташриф буюрган гроссмейстерлар ҳам беллашадилар. Ўзбекистондан ҳам кучли гроссмейстерлар таклиф этилган. Ушбу турнир 17 декабрь куни бўлиб ўтади.

13-16 декабрь кунлари бўлиб ўтган баҳслар эса 16 ёшгача бўлган болалар иштирок этдилар.

Турнир ташкилий томонлама ўтган йилгига қараганда анча ўсишга эришди. Бошқа вилоятлардан ҳам спортчиларни таклиф қила олдик. Чет эллик гроссмейстерларни ҳам таклиф қилдик.

Бунинг учун, ҳамкорларимизга алоҳида миннатдорчилик билдириб ўтишимиз керак. Чунки, уларнинг ёрдамисиз буни амалга ошира олмасдик. Турнир бош ҳомийси "Venkon Group" компаниясига, шунингдек La’core, Fiori ва Ideal каби ҳамкорларимизга ўз миннатдорчилигимни билдираман.

Насиб қилса, ушбу турнир кейинги йили тўлиқ халқаро турнирга айланади.

17 декабрь кунги турнирда қозоғистонлик Муртас Кажгалиев, мисрлик Сами Шокер, Гулруҳбегим Тоҳиржонова, Саидали Юлдашев, Владимир Егин каби кучли шахматчиларимиз қатнашадилар.

Ундан ташқари, Ўзбекистон тадбиркорлари учун 10та жой ажратганмиз. Қолаверса, "Sky Chess" мактабининг кучли шахматчилари, шунингдек, ўсмирлар турнирининг кучли ўнлигига кирган спортчилар, ундан ташқари рўйхатдан ўтишга улгурган 40 нафар шахматчи ҳам иштирок этиши мумкин. Улар "Пойтахт" бизнес марказининг саккизинчи қаватида жойлашган "Sky Chess" мактабида рўйхатга ўтишлари мумкин", - деди Ҳулкар Тоҳиржонова.

Азиз Тўхтамуродов