Икки вазн тоифасида собиқ жаҳон чемпиони қўлқопларини михга илди

Британиялик 37 ёшли боксчининг бундай қарорга келишига сўнгги икки жангида мағлубиятга учрагани сабаб бўлди. Хэй 5 май куни биринчи оғир вазн тоифасида собиқ жаҳон чемпиони Тони Бельюга қарши кечган реванш жангида ҳам имкониятни бой берганди. 

Кеча Дэвид ўзининг расмий сайтида фаолиятини расман якунлаганини эълон қилди. 

“Болаликдаги орзуимга эришганимдан хурсандман. Боксни танлаганимдан асло афсусланмайман. Лекин ўз вақтида кетишни ҳам билиш керак. Фаолиятим давомида икки вазнда жаҳон чемпиони бўлдим. Келажакда нима билан шуғулланаман? Ҳозирча бу ҳақда ўйламадим”, - деди Хэй. 

Маълумот учун, Дэвид Хэй профессионал боксдаги фаолиятини 2002 йилда бошлаган. 2007 йилда Париж шаҳрида Жан-Марк Мормекни нокаутга учратиб, WBA ва WBC чемпионлик камарларини қўлга киритди. Кейин эса Энцо Маккаринеллини енгиб, WBO йўналиши бўйича жаҳон чемпионига айланди. 2009 йилда эса супероғир вазн тоифасига кўтарилди ва россиялик Николай Валуевдан WBA чемпионлик камарини тортиб олди.