Жаҳон чемпионати. Афрузада кетма-кет учинчи ғалаба, Синдоров ҳам ютди

Бу галги жаҳон чемпионати 8, 10 ҳамда 12 ёшли шахматчилар ўртасида ташкил этиляпти.

Дунёнинг 100га яқин мамлакатидан истеъдодли шахматчилар иштирок этаётган мусобақада ҳамюртларимиз – ака-ука жаҳон чемпионлари Исломбек ва Жавоҳир Синдаров, Осиё чемпиони Ҳумоюн Бекмуродов, қизлардан Мафтуна Бобомуродова, Юлия Хегай ва Афруза Ҳамдамовалар юртимиз шарафини ҳимоя қилишяпти.

Саккиз ёшлилар ўртасидаги мусобақада имкониятини синаб кўраётган Ҳумоюн Бекмуродов 3-турда қора доналарда озарбойжонлик Ҳожи-Али Гафаровга қарши бахс олиб борди ва дурангга эришди.

Ўн ёшли шахматчилар баҳсида биринчи рақам остида таснифланган Исломбек Синдоров қора доналарда ўйнашига қарамай, чехиялик Степан Хрбекни мағлуб этди.

Ўн икки ёшли шахматчилар мусобақасида иккинчи тартиб рақамли иштирокчи бўлган Жавоҳир Синдоров эса 3-турда ҳиндистонлик Мохан Кушагра билан муросага келди.

Қизларимиздан Афруза Ҳамдамова барчани ҳайратлантиришда давом этяпти. Афруза кетма-кет учинчи ғалабасини қўлга киритди. У рейтингда ўзидан юқорида турган руминиялик Александра Марияни таслим этди.

Юлия Хегай мўғулистонлик Эрдене Бат Ганди билан дурангга эришди. Мафтуна Бобомуродова эса польшалик Магдалена Пашикага ютқазиб қўйди.