Жаҳон чемпионати. Икки шахматчи 1/2 финалда, яна икки партияда тай-брек ўйналади

Жаҳон чемпионатининг соврин жамғармаси 450 000 АҚШ долларини ташкил қилади ва ғолиб шахматчи 60 000 долларга эга бўлади. Ушбу жаҳон чемпионатида юртимиз шарафини ягона вакиламиз, аёллар ўртасида халқаро гроссмейстер Гулруҳбегим Тоҳиржонова муваффақиятли ҳимоя қилди. 

Гарчи у чорак финал босқичида икки ўйин натижасига кўра амалдаги жаҳон чемпиони хитойлик Цзюй Вэньцзюнга имкониятни бой берган бўлса-да, Гулруҳбегимнинг жаҳон чемпионатидаги иштироки муваффақиятли чиқди. У рейтингда ўзидан юқорида турган уч рақибни мағлуб этди. Қора доналарда ўйнашига қарамай, амалдаги жаҳон чемпиони билан дурангга эришди. 

Афсуски, тажриба муҳим паллада ўз сўзини айтди. Саксон биринчи юришдан сўнг гроссмейстеримиз ўз мағлубиятини тан олди. Шу пайтгача ўзбекистонлик аёл шахматчилардан ҳеч бири жаҳон чемпионатининг ярим финал остонасига қадар етиб келмаган эди. 

Кечаги чорак финалнинг иккинчи партия учрашувларидан сўнг Катерина Лагно ва айнан Цзюй Вэньцзюнь ярим финал йўлланмасини қўлга киритди. Мария Музичук - Абдумалик ҳамда Александра Костенюк - Анна Музичук партияларида бугун ҳал қилувчи тай-брек ўйналади.