Жаҳон чемпионатида совриндор бўлган боксчиларимиз тақдирланди

18 октябр куни Ўзбекистон Республикаси давлат жисмоний тарбия ва спорт қўмитаси раиси Рустам Қурбонов спорт жамоатчилиги фаоллари ҳузурида бокс бўйича жаҳон чемпионатида ғолиб чиққан ва совринли ўринларни эгаллаган юртдошларимизни юксак натижалар билан табриклаб, уларга зарбоп тўнлар кийгизди ҳамда пул мукофотлари сертификатларини топширди.

Бокс бўйича Ўзбекистон терма жамоаси Германиянинг Гамбург шаҳрида ўтказилган жаҳон чемпионатида битта олтин, учта кумуш ва иккита бронза медаль жамғариб, илк
маротаба умумжамоа ҳисобида иккинчи ўринни эгаллаган эди. Йилнинг энг нуфузли мусобақасида Шаҳрам Ғиёсов барча рақибларини мағлубиятга учратиб, жаҳон чемпиони деган шарафли номга сазовор бўлганди. -69 кг вазн тоифасида олтин медальни қўлга киритган ҳамюртимиз АИБАнинг «Тwиттер» ижтимоий тармоғидаги расмий саҳифасида ўтказилган сўровнома натижасига кўра, “дунёнинг энг яхши боксчиси”, деб тан олингани диққатга сазовор.

Жаҳон чемпионатида Ҳасанбой Дўсматов, Жасур Латипов ва Иқболжон Холдоров кумуш, Бектемир Мелиқўзиев ва Санжар Турсунов бронза медальига сазовор бўлишган эди.

Шу куни Жисмоний тарбия ва спорт давлат қўмитасида Токио-2020 олимпия ўйинларига тайёргарлик қандай бораётганини таҳлил қилаётган Республика ишчи гуруҳининг навбатдаги мажлисида айнан бокс федерациясининг фаолияти кўриб чиқилди. 2017 йилги мавсум муваффақиятли кечгани эътироф этилгани ҳолда, келгусида янги зафарларга эришиш нималарга эътибор қаратиш зарурлиги муҳокама қилинди.

Қўмита матбуот хизмати