Жаҳон тожи учун матч. Саккизинчи турда ҳам муросаю мадора

Унда хитойлик икки шахмат маликаси - амалдаги жаҳон чемпиони Тань Чжуньи (2522) ҳамда даъвогарлар ўртасидаги нокаут-турнири ғолибаси Цзюй Вэнцзюнь (2571) ўзаро дона суряпти. 

Матч 10 партиядан иборат бўлиб, томонларнинг бири 5,5 очко жамғаргунига қадар давом этади. Очколар тенг бўлиб қолган тақдирда ҳал қилувчи тай-брейкка мурожаат қилинади. Дастлабки 5та партия Вэнцзюнь туғилиб ўсган Шанхай шаҳрида ўтказилганди. Қолган партияларга Таннинг ватани Чунцин шаҳри мезбонлик қиляпти. 

Ҳозирча Вэнцзюнь амалдаги чемпионни 4,5:3,5 ҳисобида мағлубиятга учратмоқда. Кеча ўтказилган 8-партияда томонлар муросага келишди. Агар бугун қора доналарда ҳаракат қиладиган Цзюй ғалаба қозонса, матч муддатидан аввал тўхтатилади ва Вэнцзюнь янги жаҳон чемпионига айланади.