Жаҳон тожи учун матч. Вэнцзюнь Хитой дербисида яққол устун

Унда хитойлик икки шахмат маликаси - амалдаги жаҳон чемпиони Тань Чжуньи (2522) ҳамда даъвогарлар ўртасидаги нокаут-турнири ғолибаси Цзюй Вэнцзюнь (2571) ўзаро дона суришяпти. Ҳар икки халқаро гроссмейстер ҳам 1991 йилда таваллуд топган.

Матч 10 партиядан иборат бўлиб, томонларнинг бири 5,5 очко жамғаргунига қадар давом этади. Очколар тенг бўлиб қолган ҳолатда ҳал қилувчи тай-брейкка мурожаат қилинади. Кеча ўтказилган бешинчи партияда Цзюй Вэнцзюнь қора доналарда ўйнашига қарамай ғалаба қозонди. 

Бугундан баҳслар Тань Чжуньининг она ватани ҳисобланган Чунцинда давом эттирилади. Ҳозирча Вэнцзюнь амалдаги чемпионни 3,5:1,5 ҳисобида мағлубиятга учратмоқда. Бугун ва эртага дам олиш куни сифатида эълон қилинган. 12 май куни 6-партия учрашуви ўтказилади.