Жамшиднинг мураббийи: “Бизга ноҳақлик қилишди”

Фаолияти давомида мағлубият нималигини билмай келаётган Жамшид Нажмиддинов собиқ жаҳон чемпиони, украиналик тажрибали боксчи Виктор Постолга қарши рингга кўтарилган эди.

Афсуски, ҳакамлар 10 раундлик жанг якунида ғалабани мезбон боксчига тақдим этишди. Ҳакамлар Жамшиднинг бешинчи раундда Постолни чуқур нокдаун ҳолатига тушириб қўйгани ва устунликка эга бўлганига эътибор ҳам қаратишмади.

“Биз жанг натижаси эълон қилинганидан сўнг шокка тушиб қолдик. Боиси, бу жанг Жамшиднинг ғалабаси билан якунланган эди. Нокдаундан ташқари яна иккита вазиятда рефери жангни тўхтатиб, ҳисобни очиши мумкин эди. Минг афсуски, ҳакамлар мезбон боксчи фойдасига қарор чиқаришди”, - дейди Нажмиддиновнинг мураббийи Набижон Исманов.

Эслатиб ўтамиз, фаолияти давомида 30та жанг ўтказиб, шуларнинг 29тасида ғалаба қозонган Виктор Постол ўтган йили америкалик Теренс Кроуфордга қарши кечган жангда чемпионлик камарини бой бериб қўйганди. Кроуфорд эса айни пайтда мутлоқ жаҳон чемпиони ҳисобланади.