Жумаев Нью-Делидаги турнирда кучли учликка кириб олди

15th Delhi International Open Grandmasters сhess tournament мусобақасида уч нафар гроссмейстеримиз – Марат Жумаев, Гулруҳбегим Тоҳиржонова ва Сарвиноз Қурбонбоевалар ҳам ўз имкониятларини синовдан ўтказишяпти. 

Кеча ўтказилган 9-тур учрашувларидан сўнг Марат Жумаев 9 имкониятдан 7,5 очко жамғариб, 3-ўринга кўтарилиб олди. Иккинчи ўриндаги шахматчи ҳисобида ҳам 7,5 очко бор. 

Жумаев 9-партияда қора доналарда ўйнашига қарамай, ўзи сингари 6,5 очко жамғариб турган ҳиндистонлик Ниранжан Навалгундни мағлубиятга учратди.

Бугун ҳамюртимиз 10-тур учрашувида мусобақанинг бешинчи тартиб рақамли иштирокчиси ҳиндистонлик Мурали Мартикеянга қарши қора доналарда ҳаракат қилади. Жумаев турнирда 20-рақам остида таснифланган.

Сарвиноз Қурбонбоева бу сафар қора доналарда ўйнаб, мезбон шахматчи Викрамжит Синхга ютқазиб қўйди. У кечаги мағлубиятдан сўнг 44-ўриндан 73-поғонага тушиб кетди.

Гулруҳбегим Тоҳиржонова эса қора доналарда ҳаракат қилиб, мезбон шахматчи Гош Ароняк билан муросага келди. Гулруҳбегим 5,5 очко билан 52-поғонани банд этган.