Каранонинг мураббийи: "Жина қўлларида эркаклардек уради, оёқларида эса отдек тепади"

Жина эртага тонгда АҚШнинг Лос-Анжелес шаҳрида ташкил этиладиган Most Valuable Promotions турнирининг асосий жангида собиқ UFC чемпиони Ронда Роузига қарши баҳс олиб боради. 

"Шундай дейман: кучи ва тезлиги ҳамон жойида. Мен Жинани узоқ вақтдан бери биламан ва у ҳақиқатан ҳам зарбаларига таянади. У худди эркаклардек уради. Бу жангда асосийси — шу сифатлардан тўғри фойдаланиш бўлади. Карано шунчалик қудратлики, ҳатто рақибасига шикаст етказиш учун бор кучи билан уриши ҳам шарт эмас. У ҳақиқатан ҳам жуда катта кучга эга. Жина мен билан ишлайдиган кўплаб йигитлардан кўра кучлироқ зарба беради. Бу ҳақиқат. Оёқлари билан отдек тепади. Асосийси, буларнинг барчасидан оқилона фойдаланишдир", - деди америкалик мутахассис MMA Fighting нашрига берган интервьюсида.

Ўз вақтида дзюдо бўйича Олимпиаданинг бронза медали совриндори бўлган Роузи жангга аниқ фаворит сифатида чиқади. Аммо Вуднинг таъкидлашича, Карано рақибаси унга таклиф қиладиган ҳамма нарсани, хоҳ у дзюдо, жиу-житсу ёки кураш бўлсин, нейтраллаш учун машғулотларда кўп ишлаган.

"Бунда ҳеч қандай сир йўқ. Бу классик зарба берувчи ва греплер ўртасидаги қарама-қаршилик, аммо ММАда ақл бовар қилмас воқеалар содир бўлади. Буюк жангчилар қандай енгилганини кўргансиз. Жиу-житсу усталарини оддий кўк камарлар енгганини кўрдик. Ўртамиёна житсерлар энг яхши ҳужумкор жангчиларни нокаутга учратганига гувоҳ бўлдик. Биз машғулот лагеримизга кучли дзюдочиларни жалб қилдик ва эртанги жангга тайёрмиз.

Рақиб нима қилишини яхши биламиз, лекин жанг бошланганда ҳаммаси ўзгаради. Битта қўл зарбаси бутун жанг режасини барбод қилиши мумкин. Битта зарба ҳамма нарсани ўзгартириши мумкин. Битта текдаун - вазият бутунлай ўзгаради. Мен жангчиларга режа билан ортиқча юк беришни ёқтирмайман. Ортиқча босимни олиб ташлаб, шунчаки жангга чиқиш керак. Нима бўлишидан қатъи назар, биз бунга тайёр турамиз", - дея хулоса қилди Вуд.