Кайрат Сатжанов: "Ҳакамлар ғалабаларимизни ўғрилашди"

Маълумот учун, ён қўшниларимиздан Санжар Ташкенбай (-48 кг), Асланбек Шимбергенов (-71 кг) ва Айбек Оралбай (-92 кг) олтин, Сакен Бибосинов (-51 кг), Маҳмуд Сабирхан (-54 кг), Серик Темиржанов (-57 кг), Дулат Бекбаулов (-67 кг), Нурканат Райис (-75 кг), Камшибек Кункабаев (+92 кг) кумуш, Саматали Толтаев (-60 кг), Нурбек Оралбай (-80 кг), Сагиндик Тогамбай (-86 кг) бронза медалларига эга чиқди. 

— Санжар Ташкенбай Осиё чемпионатида ўзини ижобий томондан кўрсата олди ва якунда чемпион бўлди. Бу билан у ушбу вазнда дунёнинг кучли боксчиларига бошоғриқ бўла олишини исботлади. 

Сакен Бибосинов барча жангларини яхши ўтказди. Ҳасанбой Дўсматовга қарши кечган финал жангида ютқазмади. У нохолис ҳакамлик қурбони бўлди. Афсуски, Сакен ҳакамлардан азият чеккан ягона боксчи эмас. Қолган бир нечта вазн тоифаларида ҳам ҳакамларга саволларимиз етарлича бўлди. Сакен биринчи раундда Дўсматовдан кучлироқ кўринди, лекин ҳакамларнинг бари ўзбек боксчисига очко ёзишди. Очколар ҳисобига кўра ютқазаётганини билган Бибосинов шошиб ҳаракат қилди. Шундай ҳолатда ҳам у уччада раундни ўз фойдасига ёзди. Аммо ҳакамлар Ҳасанбойнинг қўлини кўтаришди. 

Сабирхан Маҳмуднинг филиппинлик боксчига қарши ўтказган жангидаги ҳакамликни умуман тушунмадим. Бу жангга кўп ҳам тўхталиб ўтирмайман. 

Серик Темиржанов ҳам Осиё чемпионатини зўр ўтказди. Шахсий фикрим, у финалда ютқазмаганди. Серик ғалабага ҳақли эди.

Саматали Толтаев ярим финалда иорданиялик Муҳаммад Абу Жаджеҳга ютқазди. Жангнинг биринчи раундида Толтаев ютганди. Лекин ҳакамлар 5:0 ҳисобида раундни мезбонларга тақдим этишди. Бу ноҳақликдан руҳияти тушиб кетган Саматали хатоларга йўл қўя бошлади ва бунинг натижасида иккинчи ҳамда учинчи раундларни рақибига бой берди. Ҳа, тан оламан, боксчимиз иккинчи ва учинчи раундларни ютқазди. 

Дулат Бекбаулов таиландлик Бунжонг Синсирига қарши жанг ўтказди. Бу жангда Бунжонг ҳақли равишда ғалаба қозонди деб ўйлайман. Дулат фақат биринчи раундда яхши жанг ўтказди. 

Терма жамоамиз сардори Асланбек Шимбергенов мезбонлар вакили Зеяд Ишаишни мағлубиятга учратди. Агар темпни оширмаганида ҳакамлар унинг ғалабасини ҳам ўғирлашарди. 

Нурканат Райис финалда Саиджамшид Жаъфаровга имкониятни бой берди. Бу жангда ўзбекистонлик боксчисининг ғалабасига шубҳамиз йўқ эди. У ҳақли равишда Осиё чемпиони бўлди. Нурканат учун бу қитъа чемпионати катта тажриба мактаби вазифасини ўтаб берди.  

Сагиндик Тоганбай ярим финалда ринг эгаси Рияд Аделхиндави Одаига ютқазиб қўйди. Айбек Оралбай эса Осиё чемпиони бўлди. 

Энг оғир вазн тоифасидаги финал жангида эса яна ғалабамизни тортиб олишди. Камшибек Кункабаев мусобақада учта жанг ўтказди. Финалгача Жанубий Корея ва Тожикистон вакилларини енгди. Финалда ўзбекистонлик Лазизбек Муллажоновга ютқазди. Шахсан мен бу жангда Лазизбек устунлигини сезмадим. Иккинчи ва учинчи раундларда Камшибек яхшироқ ҳаракат қилди. Ҳатто рақибини нокаутга учратиши ҳам мумкин эди. Рақибнинг бош ва жигар қисмига кучли зарбалар йўллади. Ҳакамларнинг қарори эса ўзгача бўлди.  

Ҳар қандай ҳолатда ҳам биз ҳали бу мусобақани тахлил қиламиз. Олдинда бизни Осиё ўйинлари ва жаҳон чемпионати кутиб турибди. Биз яхши жамоага эгамиз. Яна Камшибекка қайтаман. У билан ҳали гаплашиб олишимиз керак. Кункабаев параллел равишда ҳам ҳаваскор, ҳам профессионал боксда иштирок эта олмайди. Бунақаси кетмайди.