Кун хабари. Самбо олимпия спорт тури сифатида тан олинди

Йиғилишнинг илк куни самбо спорт тури учун тарихий қарор қабул қилинди. Унга кўра, халқаро самбо федерацияси (FIAS) Олимпия хартиясининг 25-бандига биноан вақтинчалик олимпия спорт тури эътироф этилди. Вақтинчалик муддат 3 йилни ўз ичига олади. 

Халқаро олимпия қўмитаси президенти Томас Бах ушбу расмий хабар ҳамда табрикномани халқаро самбо федерацияси офисига жўнатган. 

– Бугун бутун дунё самбоси учун тарихий сана. Бутунжаҳон самбочиларининг орзулари ушалган кун. Самбо Халқаро олимпия қўмитаси томонидан тан олинди. Бу янги йил байрами олдидан самбочилар учун ажойиб совға бўлди. Бундан икки ҳафта аввал самбонинг 80-йиллиги кенг нишонланганди. Бугун эса ниҳоят самбо эътирофга сазовор бўлди, - деди халқаро самбо федерацияси президенти Василий Шестаков.

Маълумот учун, самбо бўйича биринчи жаҳон чемпионати 1973 йили Эрон пойтахти Теҳрон шаҳрида бўлиб ўтган ва унда 11 давлат спортчилари иштирок этган эди. Сочида ўтган ҳозирча сўнгги жаҳон чемпионатида эса сайёрамизнинг бешта қитъасидан 90та давлат самбочилари медаллар учун кураш олиб боришган.