Лагно блиц йўналишида жаҳон чемпиони! Тоҳиржоновачи?

Умумий мукофот жамғармаси 1 150 000 АҚШ долларини ташкил қилувчи жаҳон чемпионатининг аёллар ўртасидаги блиц йўналишида россиялик гроссмейстер Екатерина Лагно ғолибликни қўлга киритди. У 17 имкониятдан 13,5 очко жамғарди ва 2010 йилги муваффақиятини такрорлади. 

Блиц йўналишида жаҳон чемпионатининг кумуш медали Сарасадат Хадемалшарехга насиб этди. Эронлик шахматчи 13 очко жамғаришга эришди. Хитойлик Лэй Тинцзе 12,5 очко билан бронза медалига эга чиқди. 

Жаҳон чемпионатида иштирок этган ягона вакиламиз Гулруҳбегим Тоҳиржонова 17 имкониятдан 8,5 очко тўплади ва 60-поғонадан жой олди. Нафиса Мўминованинг кичик синглиси бўлган Гулруҳбегим сўнгги партияда қора доналарда ҳаракат қилди ва грузиялик гроссмейстер Нана Дзагнидзега имкониятни бой берди.