МДҲ ўйинлари. Кечаги кун қандай ўтди?

Ўз тарихида иккинчи бор ўтказилаётган ушбу нуфузли комплекс мусобақада Ўзбекистон делегациясининг жами 326 нафар спортчиси 22 та спорт турида юртимиз шарафини ҳимоя қиляпти. Кеча, 10 август куни ҳамюртларимиз бокс, муайтай, волейбол, замонавий бешкураш спорт турларида баҳсларга киришишди. 

Жумладан, 63,5 кг вазн тоифасида курашган муайтайчимиз Илёсбек Ғуломжонов делегациямиз ҳисобига бронза медалини қўшиб қўйди. Яна бир вакилимиз Давлат Шамсиев (60 кг) россиялик, Абдулфаттоҳ Алиакбаров (71 кг) туркманистонлик рақибини мағлуб этиб, ярим финалга йўл олди.

Волейбол бўйича ёшлар терма жамоамиз Арманистонни 3:0 ҳисобида мағлуб этди. Бугун улар Беларусь терма жамоасига қарши паркетга чиқишади. Замонавий бешкураш бўйича терма жамоамиз мусобақадаги иштирокини медалсиз якунлади. Кечадан Брест шаҳрида сузиш бўйича баҳслар ҳам старт олди. 

Боксчиларимиздан Самандар Олимов (54 кг) тожикистонлик, Абдуллоҳ Мадаминов (60 кг) россиялик, Бобурбек Бобожонов (63,5 кг) россиялик, Шавкатжон Болтаев (71 кг) россиялик, Фазлиддин Эркинбоев (75 кг) россиялик, Абдулазиз Абдураҳмонов (80 кг) россиялик, Халимжон Мамасолиев (92 кг) тожикистонлик рақибини мағлубиятга учратиб, финалга йўл олишди.

Ярим финалда имкониятни бой бериб қўйган Собиржон Тастанов (48 кг), Миралижон Мавлонов (51 кг), Шоҳруҳ Абдумаликов (57 кг), Муродбек Баҳриддинов (67 кг), Абдулазиз Абдураҳмонов (86 кг), Равшанжон Солиев (+92 кг) МДҲ ўйинларининг бронза медалига эга чиқадиган бўлишди.