Мейвезер ва Макгрегорнинг ММА жангидан қанча гонорар ишлаб олиши маълум

talkSPORT инсайдери Жим Уайтнинг айтишича, бу икки спортчи ўртасидаги реванш жанги ҳар қандай ҳолатда ҳам бўлиб ўтади. Конор ҳам, Флойд ҳам ҳозирги матбуотдаги чиқишлари билан реванш жангига бўлган пяр, яъни қизиқишни оширишмоқда.

“Мейвезерга яқин одамлардан реванш жанги ҳақида гап-сўз бўлаётгани ҳақида эшитдим. Ахир Конор бокc қоидалари асосида ўтказилган илк жангда ғалаба учун ҳеч қандай имкониятга эга бўлмади. У шу тариқа ютқазиб кетадиган спортчилардан эмас.

Ўйлашимча, реванш жанги албатта бўлиб ўтади. Макгрегор ММА ҳудудида қирол эканини Мейвезерга исботлашга уринади. Бу жанг ҳар икки спортчига камида 300, кўпи билан 500 миллион доллардан гонорар олиб келади”, – деди Уайт.

Эслатиб ўтамиз, ўтган йилнинг август ойида бўлиб ўтган бокс қоидалари асосидаги жангда Флойд Мейвезер 10-раундда Конор Макгрегорни техник нокаутга учратган эди.