Конор Макгрегор: "Ҳатто ҳаракат қилмасдан ҳам ҳаммадан устунман!"

Бу ҳақда ирландиялик жангчи Сауль "Канело" Альварес ва Кристиан Мбилли ўртасидаги бокс жанги якунларига изоҳ берар экан, айтиб ўтди. Ушбу жангда мексикалик боксчи ҳакамларнинг якдил қарори билан ғалаба қозониб, WBC`нинг иккинчи ярим ўрта вазн тоифасидаги чемпионлик камарини қайтариб олганди.

"Канело жанги қанча кўрилди? Аренада қанча томошабин бўлди? Чипталар сотувидан қанча даромад тушди? Мен бу одамларнинг барчасидан сотув бўйича устунман. Ҳатто катта фарқ билан. Ҳа, уларнинг ҲАР БИРИДАН! Осонлик билан. Балки, ҳатто ҳаммасини бирга олганда ҳам. Ва мен ҳатто ҳаракат ҳам қилмаяпман!

Менинг сўнгги жангим футбол бўйича жаҳон чемпионатининг ярим финали билан бир вақтда бўлиб ўтди ва ҳатто ўшанда ҳам мен ушбу ачинарли жангдан катта рақамларни тўпладим, унинг оқибатлари билан мен яна бир неча ой давомида шуғулланишим керак бўлади, кейин эса қайтиб келаман.

Лекин кейинги сафар мен жангни ҳақиқатан ҳам сотишга ҳаракат қиламан. Менинг сўнгги жангим. Қандай рақамларни тўплашим мумкинлигини кўрамиз. Мен ўз рекордларимни янгилашда давом этаман", – деб ёзди Макгрегор ижтимоий тармоқда.

Жорий йилнинг июль ойида Лас-Вегасда бўлиб ўтган UFC 329 турнирида Конор Макгрегор беш йиллик танаффусдан сўнг октагонга қайтган ва Макс Холлоуэйга қарши жангнинг дастлабки сонияларида тиззасидан жароҳат олиб, америкаликка техник нокаут билан ютқазган эди.

Ирландияликнинг дунёдаги энг кучли лига билан амалдаги шартномаси бўйича яна бир жанги қолган ва у аллақачон Макс Холлоуэй билан принципиал трилогияни келгуси йил ёзида якунламоқчи эканлигини маълум қилган.