МОҚ Жисмоний тарбия ва спорт вазирлиги билан ҳамкорликда навбатдаги видеоселекторни ўтказди

Уни Жисмоний тарбия ва спорт вазири Шоакром Исроилов олиб борди. Видеоселекторда Миллий олимпия қўмитаси ҳамда Жисмоний тарбия ва спорт вазирлиги мутасаддилари, Жисмоний тарбия ва спорт бошқармалари раҳбарлари, Олимпия захиралари коллежлари директорлари ва спорт федерациялари раҳбарлари иштирок этишди.

Бундан бир муддат олдин Миллий олимпия қўмитаси ҳамда Жисмоний тарбия ва спорт вазирлиги мутасаддиларидан ташкил топган ишчи гуруҳ вилоятларда бўлиб, болалар ва ўсмирлар спорт мактаблари, Олимпия захиралари коллежларидаги ҳолатни ўрганиб қайтганди. Ушбу ўрганиш мобайнида спорт муассасаларида кўплаб камчиликлар қайд этилганди.

БЎСМ ва ОЗКлар замон талаблари даражасида эмаслиги, камчиликларни бартараф этиш имконияти бор бўлсада, тегишли чоралар кўрилмаганлиги, ўз ҳолича ташлаб қўйилгани маълум қилинди. Сузиш ҳавзалари ва машғулот залларидаги камчиликлардан тортиб, спорт коллежларида ўқув китоблари етишмаслиги масалаларигача вазир томонидан бирма-бир қайд этиб ўтилди.

Айни пайтда терма жамоаларимиз учун асосий база ҳисобланган Олимпия захиралари коллежида фаолият олиб бораётган мураббий ва ўқитувчиларни қайта аттестациядан ўтказиш лозимлиги ҳам таъкидланди. Болалар ва ўсмирлар спорт мактаблари раҳбарларига эса имкониятдан келиб чиққан ҳолда (шарт-шароитлар, мураббийлар ва болаларнинг қизиқишлари) спорт секциялари ташкил қилиш кўрсатмаси берилди.

Шунингдек, ҳужжатлар билан ишлаш, жойларда оммавий спорт тадбирларини ташкил этиш бўйича ишларни ҳам тўғри йўлга қўйиб олиш кераклиги таъкидланди ҳамда вилоят жисмоний тарбия ва спорт бошқармаси мутасаддиларидан тегишли таклифлар олинди.

Миллий олимпия қўмитаси Бош котиби Жасур Матчанов сўзга чиқар экан, вилоятларда фаолият олиб бораётган спорт федерацияларида кадрлар масаласига алоҳида эътибор қаратиш лозимлигига алоҳида тўхталиб ўтди.